பாடல்களைப் பாடுவது என்பது 3 - 4 அகவையுடைய மழலையர்களுக்கு மகிழ்வானது. அதுவும் இசையோடு அந்தப் பாடல்களைப் பாடினால் அவர்கள் பாடிக்கொண்டே ஆடியும் மகிழ்வார்கள்.

மழலையர்களுக்குரிய பயிற்சிப் பாடல்கள் அவர்களது தாய்மொழியில், எளிமையானதாக, புரியக்கூடியதாக, அவர்களது சூழலில் உள்ளவற்றைக் காட்டுவதாக, மகிழ்வூட்டுவதாக இருக்கவேண்டும். விலங்குகள் கத்தும் ஓசை இடையிடையே வருவதாக, ஊர்திகளின் ஓசை வருவதாக இருந்தால் அந்தப் பாடல் அவர்களது நினைவில் ஆழமாகப் பதியும்.

பாடல்களின் மையக் கருத்து அச்சுறுத்துவதாகவோ, மூடப்பழக்க வழக்கங்களை வலியுறுத்துவதாகவோ அமையாமல் இருக்குமாறு பார்த்துக் கொள்ளவேண்டும். அவலச் சுவையையோ, அடுத்தவரைக் கிண்டலடிப்பது போலவோ, திட்டுவது போலவே பாடல்கள் அமையாமல் இருப்பது நலம். இதுதான் சரி, இப்படிச் செய், என ஆணையிடுவதாக அமையக்கூடாது.

இதுபோன்ற தரமான, தமிழ்ச் சொற்களையுடைய, உயர்கருத்துப் பாடல்களை இளம் மழலையர்கள் மகிழ்வோடு பாடிப் பழகப் பயிற்றுவிக்கவேண்டும். இதனால் கற்பனை வளமும், மொழியுணர்வும், ஆளுமைத்திறனும், நுட்பமும் மழலையர்களுக்குக் கிட்டும்.