அமெரிக்கா அதன் வரலாற்றில் கண்டிராத பேரிழப்பைச் சந்தித்துள்ளது. அந்நாட்டின் கடலோர மாநிலங்களை ஆகஸ்ட் 29 ஆன்று தாக்கிய "க்தரீனா" எனும் அரிக்கேன் சூறாவளி ஆயிரக்கணக்கானோரைக் கொன்றது. லட்சக்கணக்கானோரை அகதிகளாக்கியுள்ளது. செப் 25 அன்றும் இயற்கைச் சீற்றத்தால் நீர்மட்டம் உயர்ந்து நகரே தண்ணீருள் இருப்பதைக் காண்கிறோம். இது இன்னும் தொடருமா ? இது ஏன் ? இது மாறாதா ?

சிறப்புக் குறிப்புகள்

புவியின் வெப்பம் அதிகரிக்கக் காரணமான அமெரிக்கா இப்போது புவி வெப்பநிலை உயர்வின் விளைவுகளுக்கே பலியாகிறது.

மனிதர்கள் பயன்படுத்தும் பெட்ரோல், டீசல், நிலக்கரி, எரிவாயு போன்ற புதுப்பிக்க இயலாத புதை படிவ எரிபொருள்களால் காற்று மண்டலத்தில் கலக்கும் கரியமில வாயுவின் அளவு அதிகமாகிக் கொண்டே செல்கிறது. கரிமிலவாயு அடர்த்தி அதிகமாதலின் விளைவால் புவியின் மேற்பரப்பு வெப்பநிலை அதிகரிக்கிறது.

புவியின் வெப்பநிலை அதிகரிப்பதால் காலநிலைகளில் பெரும் மாற்றங்கள் நிகழத்தொடங்கியுள்ளது. கடும் புயல், பெருவெள்ளம், வறட்சி, குளிர் போன்ற விளைவுகள் வழக்கத்தைவிடக் கடுமையாகியுள்ளன. இவ்வாறெல்லாம் நடக்கும் என்பதை உலக விஞ்ஞானிகள் ஏற்கெனவே எச்சரித்து வந்துள்ளனர்.

"பசுமை இல்ல விளைவு" (Green Hous effect)என அழைக்கப்படும் மனிதச் செயல்களால் புவியின் வெப்பம் அதிகரிப்பது குறித்த எச்சரிக்கையும் அதனால் ஏற்படக்கூடிய பேராபத்துகள் குறித்தும் உலக வானிலை ஆய்வியல் கழகம்(World Meteorooogical Organisation) 1979 ஆம் ஆண்டிலேயே உலக நாடுகளை எச்சரித்தது. இதனைத் தொடர்ந்து ஐக்கிய நாடுகள் சபை (Inter governmental Panel on Climate Changes - IPCC) ஐ.பி.சி.சி. என்னும் பன்னாட்டு அறிவியலாளர்கள் குழுவை அமைத்து, சுமார் 100 நாடுகளைச் சேர்ந்த 2000 க்கும் மேற்பட்ட விஞ்ஞானிகளைக் கொண்ட இக்குழு 1990 ஆம் ஆண்டில் பசுமை இல்ல விளைவும் அதனால் புவியின் வெப்பநிலை உயர்வும் உண்மைதான் என நிரூபித்தது. உலகம் வெப்பமடைவதால் ஏற்படக்கூடிய பேராபத்துகளைத் தடுக்க வேண்டுமானால், உடனடியாக வளிமண்டலத்தில் கலக்கும் கரியமில வாயுவின் அளவைக் குறைத்தாக வேண்டும் என விஞ்ஞானிகள் எச்சரித்தனர். அதாவது, பெட்ரோல், டீசல், எரிவாயு, நிலக்கரி போன்ற புதைபடிவ எரிபொருள்களின் பயன்பாட்டை உடனடியாகக் கட்டுப்படுத்த வேண்டும்.

அதுவும் 1990 ஆம் ஆண்டில் வளிமண்டலத்தில் எவ்வளவு கரியமில வாயு கலந்ததோ, அதற்கும் கீழாக 5.2 விழுக்காடு குறையும் அளவிற்கு எரிபொருள் பயன்படுத்துவதைக் குறைத்தால்தான் உலகைக் காக்கமுடியும் என ஐக்கிய நாடுகள் சபை தீர்வை முன்வைத்தது. இந்த நோக்கில் "க்யோட்டோ" உடன்படிக்கை 1997 ஆம் ஆண்டு உருவாக்கப்பட்டது.

நன்றி : பசுதைத்தாயகம் சுற்றுச்சூழல் - செப் 2005.

கரியமில வாயுவின் உயர்வு

வளி மண்டலத்தில் கரியமில வாயுவின் அளவு 1800 ஆம் ஆண்டுவாக்கில் 281 பி.பி.எம் என்ற அளவாக இருந்தது. (பி.பி.எம். என்பது பத்து லட்சத்தில் ஒரு பங்கைக் குறிக்கும்) இது 1972 ஆம் ஆண்டில் 327 பி.பி.எம் ஆக உயர்ந்தது. இது மேலும் அதிகரித்து முறையே 1982 இல் 356 பி.பி.எம் ஆகவும், 2003 ஆம் ஆண்டில் 376 பி.பி.எம் ஆகவும் அதிகரித்தது. தற்பொழுது 2004 மார்ச்சு மாதத்தில் 379 பி.பி.எம் ஆக அதிகரித்துள்ளது. இவ்வாறாக கரியமில வாயுவின் அதிகரிப்பு மேலும் மேலும் உயர்ந்து செல்வது தொடர்கதையாகக்கூடும். ஏனெனில் இந்தச் சீரழிவுப் போக்கினைத் தடுப்பதற்கான உருப்படியான முயற்சிகள் எதுவும் இன்றுவரை வெற்றி பெறவே இல்லை.

- நன்றி : பசுதைத்தாயகம் சுற்றுச்சூழல் - செப் 2005. -