150 ஆண்டுகளுக்கு முன்பே தமிழில் மருத்துவப் படிப்பு

தமிழால் முடியுமா? என்று சிலர் கேட்கிறார்கள். ஆனால் 150 ஆண்டுகளுக்கு முன்பே தமிழால் முடியும் என்று உறுதிப்படுத்தப்பட்டிருக்கிறது.

தமிழில் மருத்துவப் படிப்புக் கற்றுத் தரப்பட்டது. அதற்கு வேண்டிய நூல்கள் தமிழில் வெளிவந்தன.

இதற்கு வழிகாட்டியவர் சாமுவேல் என்ற அமெரிக்க மருத்துவர். உடல்கூறு என்ற முதல் முருத்துவ நூலைத் தமிழில் எழுதியவரும் இவரே.

யாழ்ப்பாணம். அமெரிக்காவிலுள்ள மாச்சூசெட்ஸ் என்ற மாநிலத்தைச் சேர்ந்தவர் சாமுவேல். இவர் ஒரு மருத்துவர். கிறிஸ்தவத் தொண்டரும்கூட.

யாழ்ப்பாணத்தில் அமெரிக்கத் திருச்சபை ஒன்று இருந்தது. அதில் பணியாற்ற சாமுவேல் அனுப்பப்பட்டார்..

1847 ஆம் ஆண்டு அவர் சென்னைக்கு வந்து சேர்ந்தார். சென்னையிலிருந்து யாழ்ப்பாணத்துக்குப் போனார். அங்கு 23 ஆண்டுகள் பணியாற்றினார்.

தமிழ் படித்தார்.

யாழ்ப்பாணத்திற்கு வந்ததும், சாமுவேல் முதலில் தமிழ் படித்தார். அப்போதுதான் மக்களுடன் பழக முடியும் என்பதை அவர் உணர்ந்தார்.

தமிழ்மொழி அவருக்கு மிகவும் பிடித்துவிட்டது. உலகிலுள்ள சிறந்த மொழிகளில் தமிழும் ஒன்று - என்று அவர் சொன்னார். தமிழ் மீது ஏற்பட்ட காதலால் தனது பெயரை - மருத்துவர் பச்சையப்பன் - என்று மாற்றிக் கொண்டார்.

சாமுவேல் பிஸ் கிரீன் என்பது அவரது முழுப்பெயர். கிரீன் என்றால் பச்சை. எனவே பச்சையப்பன் என்று பெயா வைத்துக் கொண்டார்,.

மருத்துவமனை.

யாழ்ப்பாணத்தில் மணிபாய் என்ற இடத்தில் 1848 இல் ஒரு மருத்துவமனை திறந்தார். ஆசியாவில் தொடங்கப்பட்ட முதல் ஆங்கில மருத்துவமனை இதுதான்.

இந்த மருத்துவ மனையில் மருத்துவக் கல்லூரி ஒன்றையும் சாமுவேல் தொடங்கினார். முதலில் மூன்று மாணவர்கள் சேர்ந்தார்கள். அவர்களின் தாய்மொழியான தமிழில் பாடம் நடத்தினால் அவர்களுக்கு ந்னறாகப் புரியுமே என்று நினைத்தார். சாமுவேலுக்கும் தமிழ் தெரியும். எனவே மருத்துவப் பாடங்களைத் தமிழில் கற்றுத் தந்தார்.

பாடநூல்கள் வேண்டுமே. சாமுவேல் தாயர் செய்தார். ஆங்கில நூல்களை, தமிழ்ப் படுத்தினார். அவை மொத்தம் நாலாயிரத்துக்கு மேற்பட்ட பக்கங்கள்.

உடல்கூறு.

அப்போது சென்னையில் கிறிஸ்தவ கல்விக் கழகம் ஒன்று இயங்கியது. அவர்கள் தமிழில் அதிக நூல்கள் வெளியிட்டனர். மருத்துவ நூல்களையும் தமிழில் வெளியிட விரும்பினார்கள். நூல்கள் எழுதித் தரும்படி சாமுவேலிடம் கேட்டார்கள். அவர் முதலில் உடல்கூறு என்ற மொழிபெயர்ப்பு நூலைக் கொடுத்தார். இது 1855 ஆம் ஆண்டில் அச்சேறி வெளிவந்தது. தொடர்ந்து மேலும் ஏழு நூல்களை சாமுவேல் மொழி பெயர்த்துக் கொடுத்தார். அத்தனையும் வெளியிடப்பெற்றன.

தமிழ் மருத்துவநூல் தந்தை

1873 ஆம் ஆண்டில் யாழ்ப்பாணத்தில் ஓய்வு பெற்று அமெரிக்காவுக்குத் திரும்பினார். பிறகு காலமானார்.

மாச்சூசெட்ஸ் நகரில் அவரது கல்லறை இருக்கிறது. அதில் தமிழ் மருத்துவ நூல் தந்தை. என்று பொறிக்கப்பட்டிருக்கிறது.

அதே நகரப் பொது நூலகத்தில் தமிழ் ஓலைச்சுவடி ஒன்று இருக்கிறது. அதன் மீது மருத்துவர் இனோகிரீன் அவர்களுக்கு மருத்துவர் சாமுவேல் பிஸ்கிரீன் அனுப்பி வைக்கப்பட்டது - என்று தமிழில் எழுதப்பட்டிருக்கிறது.

நூலின் பெயர் குணபாடல் என்பது. 148 பாடல்கள் உள்ளன. நோய்களின் அறிகுறி, அதற்கு மருந்து, அந்த மருந்து தயாரிக்கும் முறை ஆகியவை பாடலாகச் சொல்லப் பட்டிருக்கின்றன.

மருத்துவக் கல்வியைத் தமிழில் கற்பிக்க முன்னோடியாக இருந்த மருத்துவர் சாமுவேல் என்ற பச்சையப்பன், தமிழ் மக்கள் நினைத்துப் போற்றுவதற்கு உரியவர்.

நன்றி : வாராந்திர ராணி - 24.4.2005
நன்றி : சிந்தனையாளன் இதழ் - சூன் 2005.