உலகெங்கும் வாழும் ஒவ்வொரு தமிழரின் நெஞ்சிலும் நீங்கா இடம்பெற்ற அரசியல் உலகின் அஞ்சா நெஞ்சர் வ.உ.சிதம்பரம் சிறையில் செக்கிழுத்த ஒப்பற்ற் தலைவர் என்பதுதான் நாடறிந்த செய்தி.

ஆனால் அவர் ஒரு இலக்கிய இலக்கணப் புலமை பெற்ற படைப்பாசிரியர். உரையாசிரியர். பதிப்பாசிரியர். மொழிபெயர்ப்பாளர். பண்டைய தமிழ் மரபுக் கவிஞர். அகிலம் போற்றும் அரசியல் தலைவர் ஒரு அறிஞர் பெருமகனார். விடுதலைப் போராட்ட வீரர். இப்படிப்பட்ட பெருமை பெற்ற தலைவரின் இறுதி வாழ்க்கை கடனிலும், கண்ணீரிலும் கழிந்தது என்பதுதான் சரித்திர சோகம்.

இளமை.. வளமை..இனிமை

வ.உ.சிதம்பரம் தூத்துக்குடி மாவட்டம் ஓட்டப்பிடாரத்தில் 1872 ஆம் வருடம் செப்டம்பர் மாதம் 5 ஆம் நாள் உலகநாதர் பரமாயி அம்மையார் தம்பதியினருக்கு மகனாகப் பிறந்தார். மூன்று சகோதரர்களும், மூன்று சகோதரிகளும் இவரோடு உடன்பிறந்தவர்கள். வீரப் பெருமாள் அண்ணாவியிடம் தொடக்கக் கல்வியைப் பயின்ற வ.உ.சி அவர்கள் கிருட்டிணன் என்பவரிடம் ஆங்கிலக் கல்வியையும் பெற்றார். ஓட்டப்பிடாரத்தில் நடுநிலைக் கல்வியைப் பெற்று உயர்நிலைக் கல்வியை திருநெல்வேலி ம.தி.நா.உயர்நிலைப் பள்ளியிலும் தூத்துக்குடியிலும் பெற்றார். திருச்சிராப்பள்ளியில் சட்டம் பயின்று தேறினார்.

இல்லறம் ஒரு இனிய அறம்

ஓட்டப்பிடாரத்தில் வட்டார அலுவலகத்தில் எழுத்தராகத் தன் பணியினைத் தொடங்கியவர். 1895 இல் தூத்துக்குடியில் வழக்குரைஞராகப் பணியாற்றினார். அதே ஆண்டில் வள்ளியம்மையை மணந்தார். 1901 இல் முதல் மனைவி மறைந்ததும் மீனாட்சி அம்மையாரை மணந்து கொண்டார். வ.உ.சிக்கு உலகநாதன், ஆறுமுகம், சுப்பிரமணியம், வாலேசுவரன் ஆகிய ஆண்குழந்தைகளும், ஞானாம்பிகை, வேதவல்லி, மரகதவல்லி, ஆனந்தவல்லி ஆகிய பெண்குழந்தைகளும் உண்டு.

அரசியல் அக்னிச் சிறகு

1905 முதல் வ.உ.சி தீவிர அரசியலில் பங்கு கொண்டார். 1906 இல் தூத்துக்குடியில் ஆங்கிலேய அரசை எதிர்த்து சுதேசக் கப்பல் கம்பெனியைத் தொடங்கினார். 1907 இல் சூரத் காங்கிரஸ் மாநாட்டில் அவர் ஆற்றிய பணி மிகவும் மகத்தானது. 1908 இல் நெலலையில் தேசாபிமான சங்கத்தைத் தோற்றுவித்தார். 1908 இல் சுப்பிரமணிய சிவா அவர்களுடன் இணைந்து தமிழகம் முழுவதும் பயணித்து, விடுதலைத் தீயை வளர்க்கத் தொடர் சொற்பொழிவுகள் தந்தார். இதனால் 1908 மார்ச் 12 இல் கைது செய்யப்பட்டார். 1908 ஜூலையில் வெள்ளைக்கார அரசால் இரட்டை ஆயுள் தண்டனை பெற்றார். கோவைச் சிறை மற்றும் கண்ணனுார்ச் சிறையிலும் 4 ஆண்டுகள் 11 மாதங்கள் வாடினார். 1912 டிசம்பர் 24 ஆம் தேதி விடுதலை பெற்றார். பின் சென்னை சிந்தாதிரிப்பேட்டை, திருமயிலை, பெரம்பூரில் ஏழாண்டுகள் (1912-1919) வாழ்ந்தார். அரிசி வியாபாரத்தில் ஈடுபட்டார். பின் கோவையில் வாழ்ந்தார். இக்காலத்தில் காங்கிரசின் மிதவாத அரசியல் தலைவர்கள் மீது கொண்ட வெறுப்பினால் தீவிர அரசிய்லிலிருந்து விலகினார். பின் 1922 இல் கோவில்பட்டியில் குடியேறி வழக்குரைஞர் பணியேற்றார். பின் 1927 இல் தீவிர அரசியலுக்குத் திரும்பினாா. பின் தந்தை ஈ.வெ.ரா. பெரியாரின் நட்பைப் பெரிதும்வளர்த்துக் கொண்டார். தன் இறுதிக் காலத்தில் தூத்துக்குடிக்குக் குடியேறினார். 1936 நவம்பர் 18 ஆம் தேதி வ.உ.சி மரணமடைந்தார்.

வ.உ.சி - உயிலின் உள்ளடக்கம்

தூத்துக்குடி திரு.அ.செ.க.கந்தசுவாமி அவர்களுக்கு வ.உ.சிதம்பரனார் எழுதித் தந்த உயில்தான் அவரின் பின்னாள் சோகத்தினை நமக்குத் தெளிவாக்கும். தன் குடும்ப நிலையைப் பற்றிக் கண்ணீர் வடித்து அவர் எழுதிய உயிலின் உள்ளடக்கம் நமது கண்ணீரை வரவழைக்கும்.

சொத்து விபரங்கள்

பம்பாய் எம்பெயர் ஆஃப் இந்தியா அஷ்யூரன்ஸ் கம்பெனியில் ஆயிரம் ரூபாய்க்கும், ஓரியன்டல் லைப் அஷ்யூரன்ஸ் கம்பெனியில் ஆயிரம் ரூபாய்க்கும், ஆயுள் காப்பீடு செய்திருக்கிறார். இந்த இரு கம்பெனியிலும் ரூபாய் ஐநூறு கடன் வாங்கியிருக்கிறார். கிடைக்கும் லாபம் ரூபாய் ஐநூறு அந்தக் கடன்களுக்குச் சரியாய்ப் போகும். கடைசி பிரிமியமும் கட்டவில்லை. அந்த இரு ஆயுள் காப்பீட்டுச் சான்றிதழ்களைத் தன் மனைவி பெயருக்கு மாற்றி எழுதியிருக்கிறார். இது தவிர ஓட்டப்பிடாரத்தில் பெரிய புஞ்சையில் இரண்டு சங்கிலி நிலமும், பதினாறு மரக்கால் நஞ்சையும், அதனருகில் கிணற்றுத் தோட்டம் என்ற ஒரு நிலமும், கீழ்க்காட்டில் 13-4 சங்கிலி கரிசல் புஞ்சை ஒன்றும், 3-4 சங்கிலி கரிசல் புஞ்சை நிலமும் உண்டு.

இரண்டும் மக்களால் பயன்படுத்த முடியாததால் ரூ 500 க்கு விற்பனை செய்ய விரும்பியுள்ளேன். ஓட்டப்பிடாரத்தில் ஒரு காரைக்கட்டு மட்டப்பா வீடு ஒன்று உள்ளது. அவற்றை மராமத்து செய்து மனைவி குடியிருந்து வரலாம். ஆத்தூர் பிரமு அம்மாள் வ.உ.சியின் மனைவிக்கு எழுதிக் கொடுத்த அடமான சொத்துப் பத்திரம் பற்றியும் சொல்லியிருக்கிறார். 200 ரூபாய் மதிப்புள்ள சட்டப்புத்தகங்களை விற்பது குறித்தும் சொல்லியிருக்கிறார்.

கடன் பற்றி தகவல்கள்

தூத்துக்குடி நேசனல் பேங்க் ஆப் லிமிடெட்டுக்கு ஐந்து மாத வீட்டுவாடகை ரூ135.
தூத்துக்குடி சரோஜினி ஸ்டோர்ஸ் ஜவுளி பாக்கி ரூ30
வன்னியஞ்செட்டியார் எண்ணெய் கடைக்கு சுமார் ரூ30, மற்றும் சில்லறைக் கடன் ரூ60
இன்ஸ்பெக்டர் பிள்ளைக்கு ரூ20, சோமசுந்தரத்திற்கு ரூ16, வேதவல்லிக்கு ரூ50 - மொத்தம் ரூ86
தனது தம்பி மீனாட்சி சுந்தரத்திற்கு சாப்பாடு கிடைக்க வழி செய்ய விரும்பியிருக்கிறார்.
தனது மகள் ஆனந்தவல்லிக்கு விரைவில் திருமணம் செய்து வைக்க வேண்டிய தன் விருப்பத்தைச் சொல்லியிருக்கிறார். ரூ500 க்கு நகை, திருமணப்பந்தல் செலவு, சீர் சீராட்டு செய்யும் செலவு பற்றியும் அதற்கு இன்ஸ்யூரன்ஸ் பணத்தைப் பயன்படுத்த வேண்டியும் சொல்லியிருக்கிறார்.

உயிலுக்குப்பின் நிகழ்ந்தவை

உயிலில் குறிப்பிட்ட வீட்டின் மராமத்து பின்னால் நிறைவேற்றப்படவேயில்லை. தமிழக அரசு அவ்வீட்டை விலைக்கு வாங்கி நினைவிடமாக மாற்றியது. உயிலில் குறிப்பிட்ட அவரின் தம்பி மீனாட்சி சுந்தரம் வ.உ.சிக்கு விதிக்கப்பட்ட ஆயுள் தண்டனை கேட்டு மனநிலை பாதிக்கப்பட்டார்.

- பேரா. மைக்கேல் -

நன்றி : மனித நேயம் மார்ச் 2005