தமிழ் செம்மொழி

உலகில் 2796 மொழிகள் உள்ளன. இவற்றில் இலக்கிய இலக்கணம் பெற்றவை 600 மொழிகள். இவற்றுள்ளும் 2000 ஆண்டுகள் தொண்மை வரலாறு உடையவை தமிழ், சீனம், இலத்தீன், ஈபுரு, கிரேக்கம், அராமிக் என்னும் ஆறு மொழிகளே ஆகும். இதற்கு அடுத்த நிலையில் சமற்கிருதம், பெர்சியன், அரபி, முதலிய மொழிகள் இருக்கின்றன. இவற்றில் இலத்தீனும் ஈபுருவும் செத்துப் போன மொழிகள். ஈபுரு மொழிக்கு உயிரூட்டும் முயற்சியில் இசுரேல் அரசு ஈடுபட்டுள்ளது. கிரேக்க மொழி தற்பொழுது புதுவாழ்வு பெற்று வருகிறது. சமற்கிருதத்திற்கு என்றுமே பேச்சு வழக்கு இருந்தது இல்லை. எழுத்து வழக்கு மட்டுமே உண்டு.

இந்தியத் துணைக்கண்டத்தில் பேசப்படும் மொழிகள் 1652. இவற்றுள் 22 மொழிகள் மட்டுமே தேசிய மொழிகள் என்னும் சிறப்புப் பெற்று இந்திய அரசமைப்பின் 8 ஆம் அட்டவணையில் சேர்க்கப்பட்டுள்ளன. இவற்றுள் தமிழ் மட்டுமே தொன்மை, முன்மை, எண்மை, ஒண்மை, இளமை, வளமை, தாய்மை, தூய்மை, செம்மை, மும்மை, இனிமை, தனிமை, பெருமை, திருமை, இயன்மை, வியன்மை, தண்மை, மென்மை, தலைமை, அருமை என்னும் பலவகைச் சிறப்புகளை ஒருங்கே உடைய மொழியாக விளங்குகிறது.

இந்திய மொழிகளில் பன்னாட்டு மொழி எனும் தகுதிப்பாடு தமிழுக்கு மட்டுமே உண்டு. இலங்கை, சிங்கப்பூர் நாடுகளில் தமிழ் ஆட்சிமொழியாக ஒளிர்கிறது. மலேசியாவில் நாட்டுமொழி, நாடாளுமன்ற மொழியாகத் திகழ்கின்றது. தமிழில் படித்துப் பட்டம் பெறுவதை கனடா அரசு அங்கீகரித்துள்ளது. உலக அரங்கில் 57 நாடுகளில் உள்ள தமிழர்களால் பேசப்படும் மொழி தமிழ். உலகு எங்கும் பரவலாகப் பேசப்படும் ஒரே ஆசிய மொழி தமிழ். எனவே, தமிழ் இன்று பன்னாட்டு மொழிகளில் ஒன்று எனும் தகுதிப்பாட்டைப் பெற்றுள்ளது. தமிழர்கள் ஒரு மொழியினர். பன்னாட்டினர். என்னும் தகுதிப்பாட்டைப் பெற்றுள்ளனர்.

இத்தனைச் சிறப்புகள் உள்ள மொழியாகத் தமிழ் இருப்பதால்தான் 1856 இல் வெளியிட்ட திராவிட மொழிகளின் ஒப்பிலக்கணம் என்ற நூலில் அறிஞர் இராபர்ட் கால்டுவெல் தமிழ் உயர்தனிச் செம்மொழி என்று ஆய்ந்து அறிந்து நிறுவினார். தமிழ் அறிஞர் பரிதிமாற் கலைஞர் தமிழ் உயர்தனிச் செம்மொழி என்று 1885 இல் முதன் முதலில் அறிவிக்கக் கோரினார். அவருடைய முயற்சிக்குப் பின்புலமாகவும் பெருந்துணையாகவும் சுயமரியாதைச் சிந்தனையாளர் மு.சி. பூரணலிங்கம் பிள்ளை, நான்காம் தமிழ்ச் சங்கத்தை மதுரையில் நிறுவிய பாண்டித்துரை தேவர் இருவரும் இருந்தார்கள்.

மேல்நாட்டு அறிஞர்கள் டாக்டர் எமினோ, அறிஞர் சீகன் பால்கு, ஜார்ஜ் ஹார்ட், கிரியர்சன், கமில்சுவலபில், நோவோம் சாம்ஸ்கி, வின்சுலோ, கிராண்ட், ரெனால், மெட்டில், ரியாச டேவிட் முதலியவர்கள் நடுநின்று வடுவஞசி தமிழ் செம்மொழிக்குரிய தகுதிப்பாடுகள் அத்தனையும் உடையதாக இருக்கிறது என்று நிறுவியுள்ளார்கள்.

செம்மொழித் தகுதிக்கு மொழியியலாளர் வகுத்துள்ள 11 தகுதிப்பாடுகள் வருமாறு :

1. தொண்மை (Antiquity)

2. தனித்தன்மை (Individuality)

3. பொதுமைப் பண்பு (Common character)

4. நடுவு நிலைமை (Neutrality)

5. தாய்மைத் தன்மை (Parental kinship)

6. பண்பாடு, கலை, பட்டறிவு, வெளிப்பாடு

7. பிறமொழித் தாக்கமில்லாத தனித்தன்மை

8. இலக்கிய வளம் (Literary Prowess)

9. உயர் சிந்தனை (Noble ideas and ideals)

10. கலை, இலக்கியத் தனித்தன்மை, வெளிப்பாடு பங்களிப்பு

11. மொழிக் கோட்பாடு (Linguistic principles)

மேற்குறிப்பிட்ட அளவுகோலுக்கு ஓரளவு உட்பட்டு வருவனவாகவே இலத்தீன், ஈபுரு, கிரீக் முதலான மேலை நாட்டுச் செம்மொழிகளும் சமற்கிருதம், பாரசீகம், அரபி போன்ற ஆசிய மொழிகளும் அமைந்துள்ளன. இப்போது செம்மொழியாக வழக்கில் இருந்துவரும் மொழிகளுள் அனைத்துத் தகுதிப்பாடுகளும் ஒருங்கே அமையப் பெற்ற செம்மொழியாக எதுவுமே இல்லை.

தமிழ் செம்மொழி என்ற அறிவிப்பின்வழி தமிழக அளவிலும், இந்திய அளவிலும், உலக அளவிலும் நடைபெற வேண்டிய மாற்றங்களை விரைவுபடுத்துவதில்தான் மொழிக்கான முன்னேற்றம் காணஇயலும். இதற்காகச் செம்மொழி பற்றிய ஆவணங்களைப் பண்பாட்டுத் துறையிலிருந்து கல்வித் துறைக்கு மாற்ற வேண்டும் - என்று அறிவியல் அறிஞர் மணவை முஸ்தபா வலியுறுத்துவதை முற்றாக ஏற்க வேண்டும்

மொழி ஒரு சமுதாயக் கலை. சாதி, மதம், நிறம், அரசியல், கட்சி முதலியன கடந்த அனைவரும் போற்றிப் புரந்து பேணிப் பரப்பினால்தான் எமமொழியும் வாழும், வளரும், உயரும்.

பத்துபேர் கேட்டால் கோரிக்கை...பத்தாயிரம் பேர் கேட்டால் கட்டளை.

எனவே தமிழர்கள் அனைவரும் ஒரே குரலில் ஒலித்தல் வேண்டும். ஒன்றுபட்டு வற்புறுத்தல் வேண்டும். சேர்ந்து செயற்படுத்துதல் வேண்டும். குறை இருந்தால் உரியவர்களிடம் தெரிவியுங்கள். நிறை இருந்தால் நண்பர்களிடம் அறிவியுங்கள். தமிழால் ஒன்று படுவோம். குறளால் வென்று காட்டுவோம்.

வ. வேம்பையன்

நன்றி : மீண்டும் கவிக்கொண்டல் - சன 2005