உலகத்திலேயே முதன் முதலாக மனிதன் தோன்றிய இடம் - குமரிக் கண்டம்தான். அந்தக் குமரிக்கண்டம் கடலில் மூழ்கிய அதே நேரத்தில்தான் இமயமலை வெளியில் வந்தது.
அந்தக் குமரி மூழ்கியதனால், வேறு ஒரு குமரி நகரைஉண்டாக்கிக் கொண்டதனால் அதற்குக் கன்யாகுமரி என்று பெயர் சூட்டிக் கொண்டனர். கன்னி என்றால் புதிய குமரி நகரம் என்று பொருள். உலக மாந்தனாகிய தமிழன்தான்.
உலகில் கப்பல் செலுத்திய முதல் மாந்தன். அதனால்தான், கப்பலைக் குறிக்கும் தமிழ்ச்சொல்லே எல்லா மொழிகளிலும் இடம் பெற்றிருப்பதனைக் காணலாம். சிப் - என்பது கப்பல் என்பதன் மரூஉவே. நாவாய் என்பதன் மரூஉவே நேவி என்பது. கட்டுமரம் என்பதன் மரூஉவே கட்டமரன் என்பது.
கலம் என்றாலும் கப்பலே. கடலில் சென்று திரும்பும்பொழுது கரை எங்கு இருக்கிறது? நாம் சென்று கரையேறவேண்டிய பகுதி எது என்பது அடையாளம் தெரிந்து கொள்ள - குறிப்பாக இரவில் தெரிந்துகொள்ளக் கரையில் ஓர் உயரமான தூணை நிறுவி அதன் மீது கட்டைகளை இட்டு எரித்து வெளிச்சத்தை உண்டாக்கி அடையாளம் காட்டினான். அதற்குப் பெயர் சூட்டினான் கலங்கரை விளக்கம் என்று.
கலம் என்றால் கப்பல். கரை என்றால் கடலின் கரை. விளக்கம் என்றால் விளக்கு என்று பொருள்கொள்வதே வழக்கம். கரை என்பதற்கு இதனைவிட வேறு ஒரு சிறப்பான பொருள், அழைத்தல் என்பதாகும். காகம் கரைகிறது என்று கூறுகிறோம். காக்கை கரவா கரைந்துண்ணும் ஆக்கமும் அன்னநீரார்க்கே உள (திருக்குறள் 527) கரைந்துண்ணும் என்றால் அழைத்துண்ணும் என்பதே பொருள்.
கலங்கரை விளக்கம் - என்பதற்கு மரக்கலம் வழிஅறிந்து வருவதற்காகக் கரையிலே வைக்கப்பட்டுள்ள விளக்கு - என்ற பொருளை உரைத்துக் கொண்டிருந்தோம். இனிமேல் கடலிலே வருகின்ற கப்பலை இங்கே வா இங்கே வா என்று அழைக்கின்ற விளக்கு - என்னும் உண்மைப் பொருளைக் கொள்வோமாக.

புலவர். வெற்றியழகன்
நன்றி. கண்ணியம் திஙகளிதழ்