குறட்பாக்களை இசையமைத்துப் பாடி, உலகிலேயே முதன் முறையாக மூன்று மணி நேரத்தில் திருக்குறள் முழுமையையும் இசைவடிவில் கேட்டுவிடும்படியாக ஒலிப்பேழைகளில் நான் பதிவுசெய்து வெளியிட்ட சாதனையைக் கேள்விப்பட்ட நம் பாரதக் குடியரசுத்தலைவர் மேதகு. டாக்டர்.ஏ.பி.ஜே.அப்துல்கலாம் அவர்கள் என்னைச் சிறப்பு அழைப்பாளராக அவருடைய மாளிகைக்கு வரும்படி புதுடில்லிக்கு அழைத்தார். முன் அனுமதி இல்லாமல், யாரும் எளிதில் நுழைந்துவிடமுடியாத நிலையில் பலத்த பாதுகாப்புடன்கூடிய ஆறு நுழைவாயில்கள். அனைத்து இடங்களிலும் இராணுவத்தினரின் பலத்த பாதுகாப்பு. இறுதியாக எங்களிடம் வெடிகுண்டுப் பரிசோதனைக் கருவியைப் பயன்படுத்தியபின் அனுமதி அளித்தவுடன், குடியரசுத் தலைவர் மாளிகையின் காவலர்கள்போல் காட்சியளித்த - சிவப்பு உடைதரித்த இரண்டு மெய்க் காவலர்கள்எங்களை ஒரு நீண்ட நடைபாதையில் சிவப்புக் கம்பளத்தில் நடக்கச் செய்து உள்ளே அழைத்துச் சென்று ஓர் விசாலமான அறையில் அமரச் செய்தனர்.

மிகப்பெரிய அறையில் ஒருபக்கமாக குடியரசுத்தலைவரின் இருக்கையும், மேசையும் இருந்தன. எங்களைப் பார்த்ததும், குடியரசுத் தலைவர் தம் இருக்கையைவிட்டு எழுந்து வந்து, எங்கள் கைகளைப் பிடித்து அழைத்து அவருக்கு முன்பாக அமரச் செய்தார். அழகுத் தமிழில் "வாங்க நலமாக இருக்கீங்களா ?" என்று மகிழ்ச்சியுடன் சிரித்தபடி எங்களை வரவேற்றார். அவருடைய எளிமையையும், தோற்றத்தையும் கண்டு எங்களுக்கு என்ன பேசுவது என்றே தெரியவில்லை. அவருடன் புகைப்படம் எடுத்துக் கொள்ள வேண்டும் என்ற என் விருப்பத்தைத் தெரிவித்தேன். உடனே புகைப்படம் எடுப்பவரை வரவழைத்தார். அவர் விரும்பி ஒத்துக்கொண்டால்தான் புகைப்படம் எடுக்கமுடியும். இல்லாவிட்டால் எடுக்க மாட்டார்கள். அவரிடம் நான் பாடிய திருக்குறள ஒலிப்பேழைகளைக் கொடுத்தேன். என் தந்தையார் அவ்வை சண்முகம் அவர்கள் எழுதிய சுயசரிதை நூலான 'எனது நாடக வாழ்க்கை' ஒரு படியையும் வழங்கினேன். மகிழ்வுடன் பெற்றுக் கொண்டார்கள்.

அந்நாளில் இராமநாதபுரம் விருதுநகர் பொருட்காட்சி போன்ற இடங்களில். தம் மாணவப் பருவத்திலேயே எனது தந்தையாரின் நாடகங்களைக் கண்டு வியந்ததாகக் குறிப்பிட்டார். சரித்திர வேடங்களில் தந்தையாரின் கம்பீரமான தோற்றத்தையும், அவ்வையாராக அவர் நடித்ததையும் மிகவும் ரசித்ததாகக் கூறினார். நம்நாட்டின் பெருமைமிக கலைஞர்கள் டி.கே.எஸ்.சகோதரர்கள் என்று குறிப்பிட்டார்.

பிறகு நான் பாடிய ஒலிப்பேழைகளில் இருந்து சில குறட்பாக்களைப் பாடச் சொல்ல, கேட்டு மகிழ்ந்தார். அவர் எழுதிய எழுச்சிப் பாடலான "வளமான நாடாக்குவோம் இளஉள்ளங்களைப் பொறி ஏற்றியே" என்ற பாடலை மெட்டுப்போட்டுப் பாடச் சொன்னார். நான் மோகனம் இராகத்தில் உடனே மெட்டமைத்துப் பாடினேன். மிகவும் இரசித்து என்னுடன் கூடவே சிலவரிகளையும் பாடினார்...."உங்களுக்க ஏதாவது பரிசளிக்க வேண்டுமே இருங்கள்" என்று கூறி, "என்றும் அழியாத இந்நூலைப் பரிசளிக்கிறேன், வளமான நாட்டை நாம் உருவாக்குவோம்" என்று சொல்லி, தாம் எழுதிய "இந்தியா 2020" என்ற நூலை புத்தக அடுக்கிலிருந்து எடுத்து, தம் வாழ்த்துகளையும் அதில் எழுதி, அழகாகத் தமிழில் கையொப்பம் இட்டு, என்னிடம் வழங்கினார். கள்ளமில்லாத ஒரு குழந்தையைப்போல், எப்போதும் உதிர்க்கும் அந்தப் பெருமிதமான முத்திரைச் சிரிப்புடன், எங்களுக்கு விடை கொடுத்தனுப்பினார்.