|
நோயின்றி வாழ கால்நடை வளர்ப்பு
- மருத்துவர் காசி. பிச்சை -
"மாடா உழைச்சு ஓடா தேய்ந்தவன்" என்பது நம் நாட்டுப் பழமொழி. மனிதனுக்கு உழைத்துச்
சாவதற்காகவே பிறந்தவை மாடுகள். ஓய்வெடுக்க முடியாமல், ஓட ஓட விரட்டப்பட்டு, வண்டி இழுத்து,
பட்டினியால் உடல் வற்றி, தன் முகத்தையே பார்க்கும் கன்றுக்குகூட பால் கொடுக்க முடியாமல், குடம் கணக்கில்
நமக்குப் பால் கொடுக்கும், உழைக்க மட்டுமே பிறந்த பாவப்பட்ட, பரிதாபமான உயிரிகள் நம் மாடுகள்.
செயற்கை வாழ்க்கைக்குள் மனிதன் புகுந்த பிறகுதான் மாடுகள் புறக்கணிக்கப்பட்டு விட்டன. இயற்கையோடு
இயைந்து, நோய் நொடியில்லாமல் வாழ்ந்த காலத்தில் தன்னைக் காத்துக் கொள்வதைவிட, தன் இயற்கைச்
செல்வங்களை, கால் நடைகளை, மரம் வளர்ப்பபை, நிலத்தடி நீர் ஆதாரத்தை, சுற்றுப்புறச் சூழலை, தூய்மையான
மூச்சுக் காற்றை மாசுபடாமல், குன்றாமல் குறையாமல், காத்தபடி வாழ்ந்தான் மனிதன்.
"மாட்டின் கொம்பு கூறு, மனிதனின் கொம்பு மயிறு" என்பது பழமொழி. கூர்மையாக மேல் நோக்கி வளர்ந்துள்ள
கொம்புகள்தான் சூரிய ஒளியை உள்வாங்கி உடலில் வைட்டமின் 'டி' யை உற்பத்தி செய்து கொடுக்கும்
ஆன்டென்னாக்கள். இந்த வைட்டமின் 'டி' தான் பாஸ்பரசை உறுஞ்சி எடுத்து, உள்வாங்கி கால்சியம்
பாஸ்பேட்டாக எலுமபுகளில் படியச் செய்து எலும்புகளை உறுதிமிக்க தாக்குகின்றன.
"குளம்பு பட்ட மண்ணுக்குக் குண்டுமணி எருவும் வேண்டாம்" என்பது இன்னுமொரு பழமொழி. சூரிய
ஒளியிலிருந்து உள்வாங்கப்பட்ட, இயற்கையான உயிரோட்ட சக்தி மாட்டின் குளம்பின் வழியே நிலத்துக்குப்
பரிமாற்றம் செய்யப்பட்டு, விளைநில மண்ணிலே ஊட்டம் ஏற்றப்படுகின்றது. அதனால்தான் உழவு வேலையின்
போது எருதுகளின் லாடங்களை கழற்றி விட்டு, உழவு செய்தார்கள். ஏர் பூட்டி, உழவு செய்தது சூரிய ஒளி
சக்தியை பூமிக்குள் பாய்ச்சி, வளம் கூட்டுவதற்காகத்தான் என்பதை கருத்திற் கொள்ளத் தவறிவிட்டோம்.
(கொம்பு, சாண உரம் இதன் அடிப்படையில் தான்) உழவு மாடுகள் சிறுநீர் கழிக்கும்போது 50 அடி நீளத்திற்கு
குறைந்தது 8 கிலோ மண்ணுக்கு தன் சிறுநீரால் (யூரியா) உரமேற்றி புரட்டிக் கொடுத்து, இயற்கையான வளம்
பெருகிறது. ஊரின் நிலம் முழுவதும் பல ஊர் மாடுகளின் குளம்புபட்டு உரமேற்ற வேண்டும் என்பதற்காகத்தான்
பொங்கல் விழா நாளிலும் அதன் பின்னரும் மாடுவிரட்டு, மஞ்சுவிரட்டு, எல்லைப் பந்தையம், சல்லிக்கட்டு,
என்று பல பேர்களில் பல ஊர் காளைகளை ஒரே ஊரில் கூட்டிவைத்து நில வளத்தைப் பெருக்குவதே விழாவாக,
பொங்கல் விழாவாகக் கொண்டாடி மகிழ்ந்து வந்தனர் நம் முன்னோர்கள்.
"அதிர ஓடினால் முதிர விளையும்" என்ற பழமொழி இதைத்தான் சொல்லுகின்றது. பூமி அதிர மாடுகள் ஒடினால்
அதில் விளையும் பயிர் மணிகள் முதிர்ச்சி பெறும். சாலி குறையும். முதிர்ந்த மணிகள் சுவை நிறைந்ததாக,
விதைகளாகப் பயன்படுத்தக்கூடிய முற்றிய மணிகளாக இருக்கும் என்பது முன்னோர்கள் கண்டுபிடித்துப்
பயன்படுத்திய இயற்கை விதி.
காலம் அறிவியல் தொழில் நுட்பத்தை மறந்து வேடிக்கை விநோதத்தை மட்டும் நிலைநாட்டிக் கொண்டு விட்டது
படிப்படியே வெறும் வீர விளையாட்டாக மட்டுமே பார்க்கப்பட்டு, இப்போது பொழுதுபோக்கு வேடிக்கை விழாவாக
உருமாறிவிட்டது.
ஊருக்கு ஊர் தமிழர் விழாவாக இயற்கை காக்கும் விழாவாக நடத்தப் பட்டதில் மாடுகள் அதிர ஓடி, குண்டுமணி
அளவும் எருவேண்டாத இயற்கை நிலவளத்தை பெற்றிருந்ததால் தான் ஏக்கருக்கு 4.2 டன் நெல் விளைச்சலை
எடுத்திருக்கிறார்கள்.
சாலி நெல்லின் சிறைகொள்வேலி ஆயிரம் விளையுண்டாக்க
காவிரி பிறக்கும் நாடு கிழவோனே.
- என பொருநராற்றுப்படையில் முடத்தாமக்கண்ணியார் கூறுகிறார்
ஒரு வேலி நிலத்தில் 1000 கலம் கண்டு முதல். ஓர் எக்டேரில் 436 கலம். ஒரு ஏக்கரில் 4.2 டன். கரிகாற்சோழன்
காலத்தில் கண்டுமுதல் இப்படி. "மாடுகட்டிப் போரடித்தால் மாளாது செந்நெல் என்று யாணைகட்டிப்
போரடித்திருக்கிறார்கள்".
சூரிய சக்தியை உள்வாங்கி மாற்றி நிலத்தில் விதைத்து வளம் கூட்டி அமோக விளைச்சலைப் பெருக்கித்
தந்ததால்தான் மாடுகள் போற்றப்பட்டன. ஆகவே தான் முதல் நாள் சூரியப் பொங்கலும் மறுநாள் மாட்டுப்
பொங்கலும் நன்றிப் பெருக்கு விழாவாக விதி விலக்கின்றி அனைவருமே கொண்டாடி மகிழ்ந்தார்கள் நம்பரம்பரை.
அறிவியல் மேம்பாடு பற்றிக் கூற இதனைவிட வேறு என்ன சான்று வேண்டும்?
சூரியன் போலவே தொழுது வணங்க வேண்டிய ஒன்றாக மாடுகள் கருதப்பட்டதால்தான் அவைகள் கட்டப்பட்ட
இடமும் தொழுவம் என்றானது. தொழுவத்திலிருந்து அவிழ்த்து விடப்பட்ட மாடுகள் தொழுவத்து
மாடுகளாயின.
கருமை நிறம், சூரியக் கதிர் வீச்சை உள்வாங்கக் கூடியது. மாட்டின் கொம்புகள் கருமையாக இருப்பது போல்,
மனிதனும் சூரிய ஒளியை உள்வாங்க வேண்டும் என்பதற்காகத்தான் தலை முடியும் கருமையாக இருக்கின்றது.
கருப்பாக இருக்கும் எருமைகள் சூரியக்கதிர் வீச்சை அதிகம் உள்வாங்குவதனால்தான் பாலின் அடர்த்தி கூடி
கொழுப்பும் அதிகமாக இருக்கின்றது. காராம் பசுவின் பாலே மக்கள் விரும்பி ஏற்பதில் உள்ள அடிப்படை
அறிவியல்கூறும் இதுதான்.
வெள்ளை நிறத்திலுள்ள செம்மறி ஆடுகளின் இறைச்சியைவிட கருமைநிற முடி அடர்ந்த வெள்ளாடுகளின்
இறைச்சி சத்து மிகுந்ததாக எண்ணி மக்கள் விரும்பி ஏற்கும் அடிப்படை காரணம் இதுதான், இன்று சூரியனையும்
ஒதுக்கிவிட்டோம். சூரிய கதிர் உடலில் பட்டு விடாதபடி ஆடைகளையும் மாற்றிக் கொண்டு விட்டோம்.
பசுக்களையும் நிழலிலேயே கட்டிப்போட்டு பால் கறக்கும் வித்தையையும் கற்றுக் கொண்டு விட்டோம். குடை,
தொப்பி போன்ற கவசங்கள் வேறு. சூரியக் கதிர் வீச்சை உள்ளே பாயவிட்ட பருத்தித் துணிகளை மாற்றி
செயற்கை இழை ஆடைகளால் சூரியக் கதிர் பட்டுவிடாமல் எச்சரிக்கையாகத் தடுத்துக் கொள்கின்றோம்.
சூரியக் கதிர்களை உள்வாங்கிக் கொடுக்கும் மாடுகளையும் அழித்து விட்டோம். ஆண் வர்க்கமே வேண்டப்படாத
அழிப்பு முறைகளை கற்று தெரிந்து, காளைகளை அடியோடு அழித்து விட்டோம். உள்ளதை இழந்து வேளாண்புரட்சி
என்ற கூறில் நம்மை நாமே ஏமாற்றிக் கொண்டது போலவே, வெண்மைப் புரட்சியும் முடிந்து விட்டது.
அடுத்தவர்களுக்கு எடுத்துக் காட்டாக விளங்க வேண்டிய நாம் அடுத்தவர்களை நம்பி மோசம் போய்விட்டோம்
இனியாகிலும் உண்மை உணர்ந்து நம் பாரம்பரிய கொம்புள்ள கால்நடைகளை மீண்டும் வளர்த்தெடுப்போம். நம்
வாழ்வுக்கான கொம்பன்கள் நம் மாடுகள். மாடுகளை மறந்து எந்தக் கொம்பனாலும் இயற்கை வேளாண்மை
செய்திட முடியாது. திடகாத்திரமாக நோயின்றி வாழ்ந்திட முடியாது. என்பது 57 ஆண்டு கால சோதனை
தெளிவாகப் புரிய வைத்து விட்டது.
கொம்பில்லாத மாட்டினங்களை வெண்மைப் புரட்சி என்ற பெயர் சூட்டி இறக்குமதி செய்து நம்நாட்டுக்
கொம்பன்களை அழித்தது எவ்வளவு பெரிய படுபாதகச் செயல் என்பது இப்போதாகிலும் உணரவேண்டும்.
வீம்புக்காகச் சென்ற பாதையிலேயே சென்று வழியில்லாத முட்டுச் சந்தில் முட்டிக் கொண்டு நிற்காமல்
உடனடியாக திருமபி வந்து புறக்கணிக்கப்பட்ட பழைய பாதையை மீண்டும் சீர்படுத்தி நம் பாரம்பரிய
கால்நடைகளை காத்து வெற்றிநடை போட்டு நோயில்லா வாழ்க்கை வாழ்வோம்.
வேளாண்மைக்கு புத்துயிர் கொடுப்போம். கால்நடைகளை காத்திடுவோம்
நன்றி : தினமணி - திருச்சி - 23-3-2005
|
