தமிழம் வலையின் பார்வையாளர்கள் ஒவ்வொரு நாளும் அதிகரித்துக் கொண்டே செல்வது நிறைவாக இருக்கிறது. தனிஅறையில் அமர்நது கொண்டு அலசி, அலசி தட்டச்சு செய்து இணையத்தில் வலையேற்றுவது பலருக்கும் பயனாவது குறித்து நெஞ்சு நிறைகிறது.

பொள்ளாச்சி வந்த திரு. பொற்செழியன் அமெரிக்காவிற்குத் திரும்பிவிட்டார். கதம்பம் இணையதளம் வைத்துள்ள நண்பர் திரு செளந்தர் அரைமணி நேரம் தொலைபேசியில் பேசினார். அமெரிக்காவிலிருந்து அவர் பேசியது, உலகத் தமிழ் மக்களுக்கு இன்னும் நிறைய செய்யவேண்டும் என்ற திட்டத்தை வளர்த்தெடுத்தது. 800 எம்.பி.இணையதளத்தைத் தன்னுடைய சொந்த செலவில் தருவதாகக் கூறினார்.

(இணைய தளத்திற்கான பெயர் அமிழ்தம்)

தமிழ் கற்பிப்பதற்காகவும், தமிழ்வழியில் பள்ளிகள் உலக நாடுகளில் நடத்திக் கொண்டிருப்பவர்களை இணைக்கவும், பல்வேறு நிலைகளில் தமிழ் கற்பிக்கவும், உலகத் தமிழ்க் குழந்தைகளது ஆற்றலை வளர்க்கும் வகையில் அமைகிற பல்வேறு பாடத்திட்டங்களை உருவாக்கி இணையத்தில் வைப்பதும் இன்றைய இலக்காகக் கண்முன் எழுகிறது.

குழந்தைகளுக்கான கற்றல் கற்பித்தல் குறுவட்டுகள், ஆடல் பாடல்களின் ஒளிப்படக்காட்சிகளின் குறுவட்டுகள் ஆக்கவேண்டும் - கணினித் துறையில் ஆற்றல் உள்ள நண்பர்கள் உதவினால் இதனை வென்றெடுக்கலாம். என்ன செய்யவேண்டும் என்ற கருத்து இருக்கிறது ? கணினியில் ஆற்றல் உடையவர்கள் தொழில்நுட்பப் பகிர்வு கொடுத்தால் போதும்.

திரு செளந்தர் அவர்களது உதவியால் புதிய மின்னஞ்சல் கிடைத்துள்ளது. இனி இந்த மின்அஞ்சலில் தொடர்பு கொள்ளலாம் - pollachinasan@gmail.com -

உலகநாடுகளில் தமிழ்ப் பள்ளிகள் நடத்தி வருபவர்கள் தங்களது பள்ளி பற்றிய குறிப்பை - புகைப்படத்துடன் அனுப்பி வைக்கவும். நான் கண்டறிகிற நுட்பமான பாடத்திட்டங்கள் அனைத்தும் இணையத்தில் முழுமையாக வைக்க விரும்புகிறேன். தமிழ்ப் பள்ளிகள் பயன்படுத்திக் கொள்ளலாம்.

என்றும் அன்புடன்,