ஆலங்கட்டி மழை

எங்கேயோ விழுந்து
வெடிக்கிறது வெடி.

உறுப்புகள் தெறித்து
திசையெங்கும் பறக்க
எழும்
கடைசிக் கேவலாய்
ஓலமிடுகிறது காற்று.

மின்சாரம் செத்து விழ
எங்கும்
பிணமாய் அழுத்துகிறது இருட்டு.
தொண்டையில் சிக்கிய
உணவுக் கவளம் சிதற
அலறுகின்றன குழந்தைகள்.

கூரையின் பிளவுவழி
விழுகிறது மின்னல்.
உயிரோலம் எழுப்பும் பிள்ளைகளை
அடிவயிற்றில் பொதித்துக் கொண்டு
மேல் கவிகிறார் அம்மா....

விமான இறக்கைகளாய்க்
காற்றைக் கிழித்தவாறு
பனி எறி குண்டுகளைப் பொழிந்து கொண்டு
உணர்ச்சியற்றுப் பெய்கிறது.
அந்நிய தேசத்து
ஆலங்கட்டி மழை.

செந்தில் குமார் - உடுமலைப்பேட்டை