சென்ற முறை வலையேற்றுவதற்குள் பெரும்பாடாகிவிட்டது. ஒரு வாரம் சென்னை செல்ல வேண்டியிருந்ததால் பூட்டிய அறைக்குள் எலி நுழைந்து கணினியின் இணைப்புகளைக் கடித்துக் குதறிவிட்டது. வந்து பார்த்தால் துண்டு துண்டாக ஒயர்கள். தொலைபேசியில் கணினியைச் சரிசெய்யும் நண்பர் மகேசுடன் தொடர்பு கொண்டால், சின்ன ஒயர்தானே பரவாயில்லை. மதர்போர்டிலிருந்து அதைப் பிடுங்கிவிட்டு, திருப்புலியால் தொட்டுக்கொண்டே வாருங்கள் கணினி இயங்கும் என்றார். அதுபோலவே நீட்டிக் கொண்டிருந்த இரண்டு கம்பிகளைத் தொட்டபோது காற்றாடி சுழன்று கணினி இயங்கியது(இன்று வரை அதே நிலைதான்).

கணினியை இயக்கி இணையத்திற்கு இணைப்புத் தந்தால் தமிழம்.வலைக்குள் செல்ல மறுக்கிறது. தலை சுற்றியது. இணையதளம் தந்து உதவிய நெட்சாப்ட் ஆன்லைன் திரு அரவிந்தசாமியிடம் உடனே தொடர்பு கொண்டேன். அவர் சிறிது நேரத்தில் ஓராண்டுக்காலம் முடிந்துவிட்டது. இனிப்புதுப்பிக்கவேண்டும். நாளை செய்து விடுகிறேன் என அன்போடு கூறினார். அடுத்து என்ன செய்வது ? ஒன்றுமே புரியவில்லை. வலையேற்ற வேண்டிய அனைத்தையும் குறுந்தகடில் பதிவு செய்தேன். நாளை சென்னை செல்லும் பொழுது அங்கிருந்து வலையேற்றம் செய்யலாம் என்று முடிவுசெய்தேன். எனவே 15 ஆம் தேதி வலையேற்ற முடியவில்லை.

திரு அரவிந்தசாமி 17 ஆம் தேதி இணையத்திற்கான புதுப்பித்தலைச் செய்துவிட்டார். அப்பொழுது நான் சென்னையில் இருக்கிறேன். 18 ஆம் தேதி காலை 6.00 மணிக்கு சென்னையிலுள்ள அழகி விஸ்வநாதன் அவர்களைச் சந்திக்கச் சென்றேன். அவரது உதவியால் 6,30 மணிக்கு அவரது கணினியிலிருந்து தமிழம்.வலை வலையேற்றம் செய்யப்பட்டது. இணையதளத்திற்கு அடித்தளமாக இருக்கிற இந்த நண்பர்களுக்கு நான் என்றும் கடமைப்பட்டுள்ளேன்.

16, 17 ஆகிய இரண்டு நாள்களிலும் இணையதளம் இயங்காது இருந்திருக்கும். பார்வையாளர்கள் அருள்கூர்ந்து பொருத்தருள்க.

என்றும் அன்புடன்,