டேய் அருண் மேசையில் தேநீர் வைச்சிருக்கேன். எழுந்து ஆறிப்போறதுக்கள்ள குடிச்சிடு..

அம்மாவின் குரல் கேட்டு, படுக்கையிலிருந்து எழுந்தவன் தேநீர்க் குவளையை எடுத்துக் குடிக்க நினைக்கையில் அந்த ஒரு முடி கண்ணில் பட்டது. லேசான கோபத்துடன் தேநீர்க் குவளையை வைத்துவிட்டு, குளியளறைக்குள் சென்றவன், வாளியில் நீர் பிடித்துக் குளித்திட நினைக்கையில் அதிலேயும் முடி...

அலுவலகம் புறப்படும் அவசரத்தில், சாப்பாட்டுத் தட்டின் முன் அமர, அம்மா எடுத்து வைத்த உப்புமாவிலும் ஒரு முடியிருக்க, சினத்துடன் தட்டைத் தள்ளிவைத்துவிட்டு "எனக்கு ஒன்றும் வேண்டாம்" என்று வெளியேறி வந்தவன் ஒரு உணவகத்தில் நுழைந்து தோசை வாங்கி உண்ண நினைக்கும்போது அதிலேயும் முடியிருக்க அதிர்ந்தான்.

" என்னடா இது ! காலையிலிருந்து எல்லாவற்றிலும் முடி மயமாய் இருக்கிறது ? " என்ன காரணம் என்று சிந்தித்தவாறு தலையைக் கோத கையோடு சில முடிகளும் வந்தன.

" அட என் தலையில் இருந்துதான் முடி உதிர்ந்திருக்கிறது. அது தெரியாமல் அம்மாவை வேறு சினந்து வருத்தப்பட வைத்துவிட்டோமே - என வருந்தியவனாய் அலுவலகம் சென்றான் அருண்.