பணம் எங்கே போனது ?

நேற்று சந்தையில் 100 ரூபாய் விற்ற கத்தரிக்காய் இன்று 50 ரூபாய்க்கு விற்றால் எந்த விவசாயியும் தனது 50 ரூபாய் காணாமல் போய்விட்டது என்று புலம்புவதில்லை. ஆனால் நேற்று 100 ரூபாய்க்கு விற்ற பங்கு இன்று 50 ரூபாய்க்க விற்றால் 50 ரூபாய் காணாமல் போய்விட்டது என்று பங்குசந்தை வணிகர்கள் புலம்புகிறார்கள்.

கத்தரிக்காய் சந்தையில் கத்தரிக்காய் என்ற சரக்கு பணமாக மாறுகிறது. இந்த வணிகத்தில் ஏற்ற இறக்கம் "விலை உயர்வு அல்லது விலைச் சரிவு" என்று கருதப்படுகிறது. ஆனால் பங்குச் சந்தையில் பணமே சரக்காகவும் ஆகிவிடுகிறது. பணமுதலீடு - சரக்குஉற்பத்தி - வணிகம் - பணம் என்று சுழல்வதுதான் முதலாளித்துவச் சந்தையின் வணிகமுறை. இதற்கு மாறாக, பணமே பணத்தைக் குறுக்கு வழியில் பெருக்க முயல்வதுதான் பங்குச் சந்தை. இப்படிப் பெருகும் பணத்தின் செல்லப் பெயர்தான் "நிதிமூலதனம்".

பணத்தைப் பெருக்கும் பணம் என்ற நிலையை அடைய வேண்டுமானால் அல்லது நிதிமூலதனம் திரளவேண்டுமானால் அந்த நாட்டில் பொருள் உற்பத்தி பலமாக இருக்கவேண்டும். எல்லாத் துறைகளிலும் வளர்ச்சி நிலைப்படுத்தப்பட்டிருக்கவேண்டும். மாறாக பங்குச் சந்தையில் நிதிமூலதனம் வந்து பெருகுவதால் உற்பத்தி பெருகாது. பொருளாதாரம் வளராது. முதலாளித்துவப் பொருளாதாரத்தின் குணமே இப்படிப் பொருளாதாரத்தைத் தலைகீழாகப் பார்த்துச் செயல்படுத்துவதுதான். தலைகீழாகப் பார்த்து நிபுணர்கள் புளகாங்கிதமும் அடைவது மட்டுமின்றி அவர்களோடு சேர்ந்து நாமும் குதூகலிக்க வேண்டும் என்று எதிர்பார்ப்பார்கள்.

பங்குச் சந்தை தொழிலை வளர்க்க உதவிடும் பங்குச் சந்தையாக இருக்க வேண்டுமே தவிர, பணம் பண்ணும் "மந்திர வித்தையாக" இருக்கக்கூடாது. அது பொருளாதாரத்தை முடக்கிவிடும். இன்று இந்தியாவின் பொருளுற்பத்தி மந்தமாகிப் போனதற்கு இந்தப் பங்குச் சந்தைத் தில்லு முல்லுகளே காரணம்.

- வே. மீனாட்சி சுந்தரம் -