புதுச்சேரியிலிருந்து இறைவிழியனார் தொடங்கித் தொடர்ந்த இதழ் இது. ஆறாவது ஆண்டின் எட்டாவது இதழ் இது. பதிவு பெற்ற இதழ். இறைவிழியனாரின் மறைவிற்குப்பிறகு இதழ் என்னவாகுமோ என்று இருந்த பொழுது, இதழை மிகச் சிறப்பாக இலக்குநோக்கி, வீறுடன் அன்னாரது துணைவியார் திருவாட்டி அரியநாயகி இறைவிழியனார் தொடர்ந்து வருவது பாராட்டத்தக்கது. தெளிதமிழ் உணர்வோடு, தமிழியச் சிந்தனைகளை விதைத்து மக்களை வழிநடத்த ஒரு இதழ் தொடருவதென்பது இன்றைய சூழலில் கிடைத்தற்கரியதாகவே உள்ளது. தொடருகிற நற்றமிழை வாழ்த்துவோம். இந்த இதழில் ப.அருளி அய்யா மிகச் செறிவாக தாய் என்ற சொல்வழி உலக மொழிகளை யெல்லாம் ஆய்வு செய்து திரட்டி கட்டுரையாக்கித் தந்திருப்பது நுட்பமாக உள்ளது. இது போன்ற கட்டுரைகள் தமிழின் பெருமை உணர்த்தும், தமிழனை உயர்த்தும், வேலூர் தமிழியக்கச் செய்தியும், நூல் அறிமுகமும் சிறப்பாகவே உள்ளன. குறித்தபடி படைத்த பாடல்கள் நன்றாகவே உள்ளன. இன்றைய தேவை நம் தமிழ் மழலையர்களுக்கு இசையுடன் பாட இசைப்பாடல்கள், தெளிதமிழில், எளிமையான சொற்களில், அவர்களுக்கு ஈடுபாடு உள்ள பொருள்களில், அறிவையும், மானத்தையும், தமிழ்ப் பெருமையையும் விதைக்கிற 4, 6, 8 வரிகளில் 3 அல்லது 4 சீர்களை உடையதாக உள்ள இசைப்பாடல்கள் வேண்டும். அவை நம் தமிழ் மழலையர்களைச் சென்றடைய வேண்டும். அவர்கள் இதனைப் பாடவேண்டும். இனிவரும் அந்த இளம் தலைமுறையினராவது தமிழ் உணர்வோடு மேலெழ வேண்டும். இதற்குப் பாவலர்கள் அனைவரும் சிந்திக்க வேண்டும், எழுத வேண்டும். அதைவிடுத்து ஏதோ ஒன்று எழுதி தான் மட்டும் பார்த்து மகிழுவது, நூலாக்கி அடுக்குவது என்பது தமிழிய வளர்ச்சிக்கு வழிவகுக்காது. பாவலர்கள் சிந்திக்கவும்.