தஞ்சையிலிருந்து வெளிவரும் இந்த இதழ் சுகனின் குடும்பமே முன்நின்று தொடருகிற இலக்கியச் சிற்றிதழ் ஆகும். விளம்பரங்கள் ஏதுமில்லாது, கருத்துச் செறிவொன்றினையே கருத்தாகக் கொண்டு தொடருவது. எழுது கோலால் எண்ணங்கள் திறப்போம் என, ஆசிரியரின் அனுபவப் பிழிவுத் தலையங்கம் ஒவ்வொரு இதழிலும் துடிப்புடன் சுட்டிக்காட்டுவது. தரமான இலக்கியவாதிகளை அரவணைப்பதில், அவரது கருத்துகளை வெளியிடுவதில் சுகன் இதழ் பாசத்தோடு செயல்படுவது குறிப்பிடத்தக்கது. இவரது அன்புப் பிடியில் முதன்மை வகிப்பவர்கள் இவரது தாத்தா அமரர் கே.வி.திருஞானமும், அமரர் தஞ்சை பிரகாசும் ஆகும். அனைத்து இலக்கியவாதிகளையும் நேரில் கண்டு நேர்காணலைப் பதிவு செய்வது இவரது உயர்தன்மை. கடித இலக்கியம் இதழுக்குச் சிறப்புச் சேர்ப்பதே. தரமான சிறுகதைகளையும், உரைவீச்சுகளையும் இதழ் தொடர்ந்து வெளியிட்டு வருகிறது. கூர் என வாசகர் கருத்துகளை அப்படியே வெளியிடுவது இதழின் பாராட்டிற்குரிய அணுகுமுறை. கடந்த இருபது ஆண்டுகளாக தொடர்ந்து வெளிவரும் இந்த இதழோடு தொடர்புடைய படைப்பாளிகளை எண்ணும் பொழுது நெஞ்சு நிமிர்கிறது. இதழ் தொடர வாழ்த்துகள்.