ஆசிரியர் சங்கமித்ரா பெரியாரியல் சிந்தனையாளர். பல ஆண்டுகளாக எழுதுபவர். தொகுப்பு நூல்களை வெளியிடுபவர். இரண்டு இதழ்களை நடத்துபவர். ( ஒடுகப்பட்டோர் குரல், சங்கமித்ரா விடையளிக்கிறார் ). பெரியார் தமிழ்ப் பேரவை நடத்துபவர். இவரது சங்கமித்ரா விடையளிக்கிறார் இதழ் எண் 28 - 2007 டிசம்பர் இதழ் முதுமையை வென்றோர் சிறப்பிதழாக மலர்ந்துள்ளது. ( இவரது ஒவ்வொரு அணுகுமுறையுமே வியப்பூட்டுவதாக இருக்கும்) ஆழமானவர். கடினமான கருத்தையும் எளிமையாகச் சொல்லுபவர். இதழ் முகவரி 1 429, தென்பெரும் நெடுஞ்சாலை, வண்டலூர் வாயில், வண்டலூர், சென்னை - 600 048 ( கைபேசி - 9841359717 ) தனியிதழ் ரூ10.

முதுமையை வென்றோர் - கி, வீரமணி - 75 வயது கடந்தவர். கடலூரில் பிறந்தவர். ஜெயகாந்தன் போன்றவர்களுடன் படித்தவர். பெரியார் நிதி உதவியுடன் அண்ணாமலைப் பல்கலைக் கழகத்தில் படித்துப் பட்டம் பெற்றவர். இளம் வயதில் பெரியாரிடம் சேர்ந்தார். ஒப்பற்ற திறமைசாலி. எழுத்தாளர், பேச்சாளர், பெரியார் விட்டுச் சென்ற ரூ 16 ஆயிரம் கோடி சொத்துகளை பூதம் போல காவல் காத்து வருகிறார்.

முதுமையை வென்றோர் - ச.அ. டேவிட் -85 வயதாகிறது. இலங்கைத் தமிழர். இலங்கை போர் பற்றி ஆங்கிலத்தில் அழகான நூல் எழுதியவர். படிப்பால் கட்டிடவியல் விஞ்ஞானி. உலக நாடுகள் பலவற்றில் பணியாற்றி இருக்கிறார். வெளிக்கடைச் சிறையில் இருந்து உயிர் தப்பியவர். தோழர் ஆனைமுத்துவுடன் சேர்ந்து பெரியார் ஈரா இதழைத் தொடங்கவும். நடத்தவும் அருந்தொண்டாற்றுகிறார். ரூ 1,00,000 வரை மாதச் சம்பளம் வாங்கிய இவர் இப்போது ரூ 800 க்கு மாணவர்களுக்கு டியூசன் சொல்லித் தருகிறார்.

முதுமையை வென்றோர் - பழ.நெடுமாறன் - 75 வயதைக் கடந்தவர். காங்கிரஸ் கட்சியில் இருக்கும் போது மாவீரன் என்று பெயர் பெற்றவர். 1991 இல் கடைசியாக எம்.எல்.ஏ.வாக இருந்தார். இப்பொழுது உலகத் தமிழ் பேரமைப்பின் தலைவர். சந்தன வீரப்பனிடமிருந்து நடிகர் ராஜ் குமாரை மீட்டுக் கொண்டு வருவதில் பெரும்பங்காற்றியவர். இலங்கைத் தமிழர்களுக்காகவும், தமிழக நதிநீர்ச் சிக்கல்கள் தீரவும் அருந்தொண்டாற்றி வருகிறார். சாதி, மத, கட்சி கடந்த ஒரு தலைவர் என்றால் அவர் நெடுமாறன் தான்.