பெங்களூர்த் தமிழ்ச் சங்கத்தின் தொடர்பு இதழாக, இலக்கிய நுட்பங்களை, தரமான படைப்புகளை, தமிழிய உணர்வுகளை விதைக்கிற இதழாக இந்த இதழ் பெங்களூரிலிருந்து தொடர்ந்து கடந்த 31 ஆண்டுகளாக வெளிவந்து கொண்டிருக்கிறது. இந்த இதழ் சங்கத்தால் தேர்ந்தெடுக்கப் படுகிற ஆசிரியர் குழுவின் தன்மையைப் பொருத்து வடிவமைக்கப்படுகிறது. தற்பொழுது ப.சண்முகசுந்தரம் ஆசிரியராகவும் வெளியீட்டாளராகவும் இருந்து வெளியிடுகிறார். இதழின் அட்டையில் தனித்தமிழுக்காகப் பாடுபட்டு, இறுதிவரை கொள்கைப் பிடிப்போடு வாழ்ந்து மறைந்த (10-3-1933 - 01-07-1995) பாவலரேறு பெருஞ்சித்திரனார் அவர்களது படத்துடன் பாடலையும் வெளியிட்டுள்ளது. இந்திய நாட்டு விடுதலையும் தமிழர் பங்கும் என்ற மதலைமணி அவர்களின் தொடர் வாழ்த்துதற்கரியதே. இதழ் நடப்புச் செய்திகளையும், தமிழ் உணர்வுக் குறிப்புகளையும் உள்ளடக்கியதாக உள்ளது, இதழ் தொடர வாழ்த்துகள்.