ஒரு நிலத்தில் 10 மூட்டை நெல் விளைந்துள்ளது என்றால் அந்த நிலத்தை நல்ல நிலம் என்று சொல்கிறோம். அதே நிலத்தில் 15 மூட்டை நெல் விளைந்தால் சிறந்த விளைச்சல் என்றும், அதுவே 5 மூட்டையாகக் குறைந்து விட்டால் விளைச்சல் சரியில்லை என்றும் கூறுகிறோம். ஆக நிலத்தில் விளையும் விளைச்சலைக் கொண்டு அந்த நிலத்தை அளக்கிறோம். நிலத்தில் கிடைக்கும் விளைச்சல் இங்கு அளவுகோலாகிறது. விளைச்சலின் அடிப்படையில் நிலத்தின் பெருமை கூடுகிறது.

கல்வியில் இப்படி அளப்பதற்கான அளவுகோல் இல்லை. கல்விக்கான அளவுகோல் இல்லாததால்தான் - கல்வி நிலையங்கள் பெரியதாக விளம்பரங்கள் செய்து - இத்தனை விழுக்காடு மாணவர்கள் வெற்றி பெற்று இருக்கின்றனர் என்ற அறிவிப்பை வெளியிட்டுத் - தானே தலைசிறந்த நிறுவனம் என்று பறைசாற்றுகிறது. மாயையில் சிக்கிய பெற்றோர்களும் விளம்பரங்களைப் பார்த்து நிறுவனங்களில் சேர்த்து விடுகிறார்கள்.

அண்மையில் ஒரு மிகப்பெரிய கல்வி நிறுவனத்திற்குச் சென்றிருந்தேன். கழுத்து வலிக்கும் அளவிற்கு உயரம் உயரமான கட்டங்கள் - மருத்துவம், பொறியியல், மேலாண்மை என அனைத்தும் இருந்தன. பார்த்துக் கொண்டிருக்கும்போதே ஒரு மாணவன் திடீரென்று ஓடிவந்து கையில் உள்ள சங்கிலியால் அடுத்தவனை அடித்தான். இரத்தம் சொட்டச் சொட்ட அவன் ஓடினான். அவனைத் துரத்திக் கொண்டு ஒரு கும்பல் ஓடியது. 10 நிமிடத்திற்குள் எதுவுமே நடக்காதது போல அமைதியானது. யாரும் எதைப்பற்றியும் கவலைப்படவில்லை. இது பல்கலைக் கழகம் / கல்லூரி நிலை என்றால் மேல்நிலை, உயர்நிலைப் பள்ளிகளின் நிலை இன்னும் மோசமாக இருக்கிறது.

மேல்நிலை, உயர்நிலைப் பள்ளிகளில் இப்பொழுது படிப்பை முடித்துவிட்டு வெளியே வரும் மாணவர்கள் எந்தத் திறனும் இல்லாமல் வெளிவருகிறார்கள். மொழிப்பாடம், கணிதம், அறிவியல், சமூகவியல் - என வரிசைப்படுத்தப்பட்டுள்ள பாடங்களில் கூட புரிதல் ஏதுமற்று - வினாவிற்கான விடை எழுதுகிற இயந்திரங்களாகத்தான் மாணவர்கள் இருக்கிறார்கள். அவர்களது உள்ளார்ந்த திறன்கள் வளர்த்தப்பட வில்லை. தமிழகத்தில் இந்த நிலை தொடருகிறது.

கல்வியை அளப்பதற்கான அளவுகோல் இல்லை. அளவுகோல் ஒன்று இருக்குமானால் கல்வி நிறுவனங்கள் ஏமாற்ற முடியாது. அளவுகோலுக்கு ஏற்றவாறு மாணவர்களை உருவாக்க வேண்டியது தவிர்க்க முடியாததாகிவிடும். இப்பொழுது வினா விடைக்கு ஏற்றவாறு மாணவர்களை உருவாக்குகிறார்கள். புரிதல் இல்லை. இந்த நிலையை மாற்ற கல்விக்கான அளவுகோல் வேண்டும் என்று பல ஆண்டுகளாகச் சிந்தித்துக் கொண்டிருந்தேன். கடந்த சில வாரங்களுக்கு முன்பு கல்விக்கான அளவுகோல் - மொழிப்பாடத்திற்கு - உருவாக்கி விட்டேன்.

ஒரு இதழ் - தமிழக அரசின் தமிழ்நாட்டுப் பாடத்திட்டம் மற்றும் பாட நூல்களை வெளிநாட்டு மாணவர்களுக்கு இலவசமாக அனுப்பி, வெளிநாட்டு மாணவர்களை வளர்த்தெடுக்க வேண்டும் என்று எழுதியிருந்தது. தமிழ் பேசும் தமிழ்நாட்டு மழலையர்களையே வினா விடைக்கான இயந்திரமாக மாற்றுகிற இவை - எப்படி வெளிநாட்டுத் தமிழ் மழலையர்களை வளர்த்தெடுக்கும் என்று நினைத்தேன். அதன் விளைவு இந்த - கல்விக்கான அளவுகோல் - உருவாகியது.

இந்த அளவுகோலை - மொழிப் பாடத்திற்கு மட்டும் உருவாக்கியுள்ளேன். மழலையர் வகுப்பு முதல் பத்தாம் வகுப்பு வரையுள்ள பாடத்திட்டமாக இதனை வடிவமைத்துள்ளேன்.

மேற்கூறிய படிநிலைகளில் மொழிகற்பித்தல் அமையுமானால் உலகிலுள்ள எந்த மொழியையும் விரைவில் கற்பித்து விடலாம்.

வெளிநாட்டிலுள்ள தமிழ் மாணவர்களுக்கு 3 மொழிகள் தவிர்க்க முடியாததாக அமைகிறது.

1) தாய்மொழியான தமிழ்
2) ஆங்கிலம்
3) சூழலிலுள்ள பிற மொழி

தாய்மொழியைத் தொடக்க நிலையிலிருந்தும் ( 3 + ), ஆங்கிலத்தை மூன்றாம் நிலையிலிருந்தும் ( 7 +), சூழலிலுள்ள பிற மொழியை ( 10 +) ஆறாம் நிலையிலிருந்தும் கற்பிக்கத் தொடங்கலாம். தாய்மொழியும், சூழலிலுள்ள பிற மொழியும் - மாணவர்களுக்கு இயல்பாகவே பேச்சு வழக்கில் புகுத்தப்படுவதால் - மிகக் குறைந்த ஆண்டுகளுக்குள் இந்த மொழிகளில் மாணவர்கள் புலமை அடைந்து விடலாம்.

ஆங்கிலத்திற்கான - மொழிப் புலமை என்பதைவிட - சொற்களஞ்சியம் பெருக்குதல் என்பதுதான் - முதன்மையானதாக இருக்கிறது. எனவே இதற்காக - பட அகராதி - வீடியோ அகராதி - என்கிற தொழில் நுட்ப உதவியுடன் - மாணவர்களை அணுகும் பொழுது - மிகக் குறைந்த ஆண்டுகளில் ஆங்கிலத்திலும் மொழிப்புலமை அடைந்து விடுவார்கள்.

வெளிநாட்டிலுள்ள தமிழ் மழலையர்கள் தங்களது தாய்மொழியான தமிழைப் புறம் தள்ளி தற்பொழுது வாழ்கிறார்கள். சூழலில் தமிழ் இல்லை என்றும், பணிக்குச் செல்ல பிற மொழியே உதவுகிறது என்றும் தமிழைப் புறம் தள்ளுகிறார்கள். பெற்றோர்களும் இதைப் பற்றிக் கவலைப் படுவது கிடையாது.

பெரும்பாலான தமிழர்கள் தாயகத்திற்கு வரும்பொழுதுதான் இந்த இழப்பை உணருகிறார்கள். தாய்மொழி என்பது உயிர்த் துடிப்போடு இயங்கவைப்பது. எனவே தமிழ் மழலையர்கள் எளிமையாகத் தமிழ் கற்பதற்கான அனைத்துச் செயற்பாடுகளிலும் தமிழம் வலை தன்னை ஈடுபடுத்திக் கொள்ள விரும்புகிறது. பள்ளி நடத்துபவர்களுக்கும், பெற்றோர்களுக்கும், தமிழ்மொழி வளர்த்த இயங்குபவர்களுக்கும் - தமிழம் வலை - தன்னுடைய கண்டுபிடிப்புகள் அனைத்தையும் - இலவசமாக - அனுப்ப விரும்புகிறது. தமிழம் வலை இணையதளத்திலிருந்து யார் வேண்டுமானாலும் எந்தப் பகுதியை வேண்டுமானாலும் வலையிறக்கி நம் தமிழ் மழலையர்களுக்குத் தந்து அவர்களது தமிழ்க் கற்றலை ஊக்குவிககலாம்.

கற்றல் கற்பித்தலில் பிரச்சனைகள் ஏற்பட்டால் மின்அஞ்சல் செய்யவும். உங்கள் பிரச்சனைக்கான தீர்வினை முறைபடுத்தி உங்களுக்கு அனுப்பி வைக்கிறேன். நம் தமிழ் மழலையர்கள் தமிழ் கற்க வேண்டும் என்பதே என்னுடைய அவா.